აქ კვალიფიციური სამედიცინო პერსონალი მაღალტექნოლოგიური აპარატურით გამოიკვლევს შენი ორგანიზმის მდგომარეობას, სტრესის დონეს, დაგინიშნავს ინდივიდუალურ კომბინირებულ პროგრამას
ოცდაათ ჰექტარზე გაშენებული სამოთხე – სამედიცინო ველნეს კურორტი ბიოლი
კულტურის სამინისტრომ ქუთაისის სიმღერისა და ცეკვის სახელმწიფო ანსამბლს ტრადიციული სასცენო სამოსი გადასცა
საქართველოს კულტურისა და სპორტის სამინისტრომ ა(ა)იპ ქალაქ ქუთაისის ფოლკლორის ცენტრის სიმღერისა და ცეკვის სახელმწიფო აკადემიურ ანსამბლს საჩუქრად ტრადიციული სასცენო სამოსი გადასცა.
ანსამბლს გადაეცა ცეკვა „ყაზბეგურის“ 16 ჩოხა და ცეკვა „ფარცას“ 12 კაბა, რისთვისაც კულტურის სამინისტრომ გამოყო 12 864 ლარი. ახალი სასცენო სამოსი შეკერა ტენდერით შერჩეულმა კომპანია „ფაფანაკმა“.
2024 წლის ლევილის ქართულ ფესტივალში, რომელიც საქართველოს კულტურისა და სპორტის სამინისტროს ინიციატივითა და საქართველოს მთავრობის მხარდაჭერით მეორედ იმართება, მონაწილეობს ქუთაისის ფოლკლორის ცენტრის სიმღერისა და ცეკვის სახელმწიფო აკადემიური ანსამბლი. მნიშვნელოვანია, რომ ანსამბლი 2023 წელსაც მონაწილეობდა ლევილის ქართული ფესტივალის დახურვაში.
კულტურის სამინისტროს მხარდაჭერით, ქუთაისის ანსამბლი ასევე მონაწილეობას მიიღებს პარიზში, იუნესკოს შტაბ-ბინაში „ქართული კულტურის დღეების“ ფარგლებში გამართულ ღონისძიებებში; ასევე წარდგება ტოკიოში ქართულ ფესტივალზე.
ა(ა)იპ ქ. ქუთაისის ფოლკლორის ცენტრის სიმღერისა და ცეკვის სახელმწიფო აკადემიური ანსამბლი შეიქმნა 2010 წელს. წლების განმავლობაში ანსამბლი იზრდებოდა პროფესიონალურად და დღეს ქუთაისს ჰყავს მაღალი საშემსრულებლო დონის სიმღერისა და ცეკვის სახელმწიფო აკადემიური ანსამბლი, ურთულესი რეპერტუარით. მნიშვნელოვანია, რომ ანსამბლი აქტიურად თანამშრომლობს საქართველოს ფოლკლორის სახელმწიფო ცენტრთან.
ქუთაისის სიმღერისა და ცეკვის სახელმწიფო აკადემიური ანსამბლი 14 წლის განმავლობაში აქტიურად მონაწილეობს ქალაქის კულტურულ ცხოვრებაში, მართავს სოლო კონცერტებს ქუთაისსა და საქართველოს თითქმის ყველა რეგიონში: თბილისში, ბათუმში, ანაკლიაში, ახალციხეში, გუდაურში, წყალტუბოში, ვანში, ოზურგეთში, ზუგდიდში.
ანსამბლი მონაწილეობდა არაერთ საერთაშორისო მასშტაბის ღონისძიებაში. ქორეოგრაფიული ჯგუფი იმყოფებოდა საერთაშორისო ფესტივალებზე: 2011 წელს – იტალიის ქალაქ ტრენტოში, 2013 წელს – თურქეთის ქალაქ ბურსაში; საკონცერტო ტურნე ჰქონდათ: 2015 წელს – უნგრეთში, ქუთაისთან დაძმობილებულ ქალაქ სომბათეიში, 2018 წელს – შვეიცარიაში, 2020 წელს – პოლონეთში, 2015, 2017, 2018, 2019 წელს – უკრაინაში.
აღსანიშნავია, რომ ქუთაისის სიმღერისა და ცეკვის სახელმწიფო აკადემიური ანსამბლი მონაწილეობდა 2023 წელს საფრანგეთში, ლევილის ისტორიულ მამულში, საქართველოს კულტურის სამინისტროს მხარდაჭერით გამართულ ქართული ხელოვნებისა და კულტურის ფესტივალში; ანსამბლმა მუსიკალური ნომრები წარადგინა საქართველო-საფრანგეთის კულტურული ურთიერთობის განვითარების ხელშეწყობის მიზნით გამართულ საქართველოს საგარეო საქმეთა მინისტრისა და დიპლომატიური კორპუსის საზეიმო მიღებაზე.
მომღერალთა გუნდი თავისი შემოქმედებით წარდგა ბათუმის ფოლკლორისა და სასულიერო მუსიკის VI საერთაშორისო ფესტივალზე (2011 წ.), 2013 წელს – უკრაინაში, ტერნოპოლის სასულიერო და ფოლკლორის საგუნდო ფესტივალზე (I ადგილი), 2014 წელს – ლიტვაში, ვილნიუსის ფოლკლორის საერთაშორისო ფესტივალზე, 2015 წელს – ვილნიუსში, „თბილისობის“ დღესასწაულზე, 2016 წელს – ფლორენციაში, მონტეკანტინში საგუნდო ფესტივალზე, საირმეში – მუსიკალურ ფესტივალზე „საირმე 2017“, 2019 და 2022 წელს – ზუგდიდში, პოლიკარპე ხუბულავას სახელობის მეგრული ფოლკლორის საერთაშორისო ფესტივალზე „კოლხი და…“
საქართველოს ფოლკლორის სახელმწიფო ცენტრის საკონცერტო დარბაზში 2019 წელს გაიმართა ვაჟთა გუნდის სოლო კონცერტი. გუნდმა 2022 წელს ტრადიციული მრავალხმიანობის მე-11 საერთაშორისო სიმპოზიუმში მიიღო მონაწილეობა. 2023 წელს მონაწილეობდა გონიოში გამართულ მელიტონ კუხიანიძის სახელობის ქართული ხალხური სიმღერის ფესტივალში, 2024 წელს – ესპანეთის სამეფოში გამართულ საერთაშორისო საგუნდო ფესტივალში „მონსერატის ოქროს ხმები“ (გრან-პრი).
2022 წლის დეკემბერში სიმღერისა და ცეკვის სახელმწიფო ანსამბლს მიენიჭა აკადემიური ანსამბლის სტატუსი და 2023 წლის 6 ივლისს გაიხსნა ქუთაისის სიმღერისა და ცეკვის სახელმწიფო აკადემიური ანსამბლის ვარსკვლავი.
აღსანიშნავია, რომ ქუთაისის სიმღერისა და ცეკვის სახელმწიფო ანსამბლი ქუთაისის მუნიციპალიტეტის მერიის მმართველობის სფეროში მოქმედი ანსამბლია და მერიის დიდი მხარდაჭერითა და ხელშეწყობით ვითარდება, რისთვისაც კულტურის სამინისტრო მადლობას უხდის ქუთაისის მერიას.
ინფორმაციისთვის: შესაფერისი ხარისხის, ინდივიდუალური ესკიზების მიხედვით შექმნილი ტრადიციული სასცენო სამოსის ნაკლებობა სახელმწიფო და კერძო ფოლკლორული ანსამბლების წინაშე არსებული ერთ-ერთი აქტუალური გამოწვევაა.
დაახლოებით 15 წლის განმავლობაში სახელმწიფოს ანსამბლებისთვის ახალი სამოსი არ შეუძენია, სწორედ ამიტომ კულტურის სამინისტრომ 2021 წლის დეკემბერში გამოყო 197 999 ლარი და გამოაცხადა პირველი ტენდერი.
შედეგად 2022 წლის პირველ ნახევარში სასცენო სამოსი (70 კაბა და 277 ჩოხის კომპლექტი) შეიკერა 12 ანსამბლისა და ორი სოლისტისთვის, კერძოდ, ანსამბლების: „ბერმუხას“, „ბასიანის“, „დიდგორის“, „სახიობის“, „ძირიანის“, „შილდის“, „ჩვენებურების“, „რიჰოს“, „ერისიონის“, „რუსთავის“, „სუხიშვილების“, მესტიის სალოტბარო სკოლისა და სოლისტების – ტრისტან სიხარულიძისა და ლელა თათარაიძისთვის.
იმავე წელს სამინისტრომ გამოყო 133 360 ლარი, შედეგად მომდევნო წელს დამზადდა სასცენო სამოსი კიდევ რვა ფოლკლორული ანსამბლის: „შავნაბადას“, „ადილეის“, „იალონის“, „მარგალიტის“, „გურჯაანის“, „მთიების“, „სათანაოსა“ და ქ. ინეგოლის (თურქეთის რესპუბლიკა) ანსამბლისთვის.
2023 წელს სასცენო სამოსი დამზადდა (117 ჩოხა-ახალუხის კომპლექტი, ექვსი ხევსურული ჯუბა და 52 კაბის კომპლექტი) კიდევ ათი ანსამბლისთვის.
2023 წლის ხელშეკრულებით გათვალისწინებული პირობების შესრულება სამინისტრომ 2024 წლიდან დაიწყო.
მიმდინარე წელს სასცენო სამოსი უკვე გადაეცა: სსიპ ილიკო სუხიშვილისა და ნინო რამიშვილის სახელობის ქართული ნაციონალური ბალეტის სახელმწიფო აკადემიურ დასს, კვინტეტ „ურმულს“ (ფიზიკური პირი ნუგზარ ქავთარაძე), სსიპ საქართველოს თეატრისა და კინოს სახელმწიფო უნივერსიტეტის ქართული და მსოფლიოს ხალხთა ცეკვების ქორეოგრაფიულ ანსამბლ „როკვას“, სსიპ საქართველოს ხალხური სიმღერისა და ცეკვის სახელმწიფო აკადემიურ ანსამბლ „ერისიონს“, ა(ა)იპ „თუთარჩელა 2004“-ს, ა(ა)იპ-ს, ანსამბლს – „მე, რუსთველი“.
დაგეგმილია სამოსის გადაცემა შემდეგი ანსამბლებისთვის: ა(ა)იპ სამეფო ნაციონალური ბალეტის დასი, აფხაზეთის სიმღერისა და ცეკვის სახელმწიფო ანსამბლი და ა(ა)იპ ხალხური სიმღერისა და ცეკვის ანსამბლი „ნართები“.
ეს ანსამბლები კულტურის სამინისტრომ ანზორ ერქომაიშვილის სახელობის ფოლკლორის სახელმწიფო ცენტრთან თანამშრომლობით შეარჩია.
ტურიზმის ეროვნულმა ადმინისტრაციამ კერძო სექტორის 250-მდე წარმომადგენელი გადაამზადა
საქართველოს ტურიზმის ეროვნული ადმინისტრაცია მთელი ქვეყნის მასშტაბით, ტრენინგებს აგრძელებს. „პირველი დახმარება“-სასწავლო კურსი ტურიზმის სექტორის 250-მე წარმომადგენლისათვის გაიმართა, – ამის შესახებ ინფორმაციას ტურიზმის ეროვნული ადმინისტრაცია ავრცელებს.
მათივე ცნობით, ტრენინგში გიდები, ტუროპერატორები, სასტუმროების თანამშრომლები და ტურიზმის სფეროში დასაქმებული პირები მონაწილეობდნენ.
„სასწავლო კურსი თბილისში, გორში, კასპში, ქუთაისში, ყვარელში, ამბროლაურში, ზუგდიდში, ახალციხესა და მესტიაში ჩატარდა.
ტრენინგის ყველა მონაწილეს ტურიზმის ეროვნული ადმინისტრაციის სერტიფიკატი გადაეცა.
„ტურიზმის ეროვნული ადმინისტრაციის ორგანიზებით წითელი ჯვარი ატარებს პირველი დახმარების ტრენინგს, ჩვენი მიზანია ვასწავლოთ მონაწილეებს თუ როგორ უნდა გადავარჩინოთ ადამიანის სიცოცხლე. პირველი დახმარების ცოდნა აუცილებელია როგორც ტურიზმის სექტორისთვის, ასევე ნებისმიერი მოქალაქისთვის“,-აცხადებს საქართველოს წითელი ჯვრის საზოგადოების წარმომადგენელი ირაკლი წურწუმია.
„როდესაც ადამიანს გადაუდებელი დახმარება ესაჭიროება თითოეული წამი მნიშვნელოვანია, შესაბამისად აუცილებელია ვიცოდეთ რა მანიპულაციები უნდა ჩავატაროთ, რომ ადამიანს სიცოცხლე შევუნარჩუნოთ სასწრაფო დახმარების მოსვლამდე. ეს ტრენინგი სასიცოცხლოდ აუცილებელია ვინც ტურიზმის და მასპინძლობის ინდუსტრიაშია, რადგან ჩვენ ყოველდღე ძალიან ბევრ ადამიანთან გვიწევს შეხება. ძალიან მოხარული ვარ რომ ტურიზმის ეროვნული ადმინისტრაციის ამ ტრენინგს ვესწრები. ძალიან ხშირად ადმინისტრაციის მიერ ტარდება ისეთი კურსები, რომელიც გვჭირდება ტურიზმის სფეროში დასაქმებულ ადამიანებს“,-ამბობს ტრენინგის მონაწილე ნათია გოგუაძე.
ტრენინგი შემდეგ თემატიკას მოიცავდა:
პირველი დახმარების ძირითადი პრინციპები და პირადი უსაფრთხოება.
პირველი დახმარება გულის გაჩერების დროს (გულ-ფილტვის რეანიმაცია).
პირველი დახმარება უცხო სხეულების გადაცდენის დროს სასუნთქ გზებში.
პირველი დახმარება ჭრილობის (მათ შორის დამწვრობის და ნაკბენების დროს – კონტექსტიდან გამომდინარე).
პირველი დახმარება სისხლდენის დროს.
პირველი დახმარება სხეულის დაზიანების დროს და დაზარალებულის გადაყვანა (გადაადგილება უსაფრთხოდ).
სხვა გადაუდებელი მდგომარეობები (გულის წასვლა, გულყრა, ზედოზირება/მოწამვლა და სხვ.)“, – აღნიშნულია გავრცელებულ ინფორმაციაში.
მესტიის აეროპორტის ახალი ტერმინალის პროექტირების კონკურსში კომპანია Green Studio-გაიმარჯვა
საქართველოს აეროპორტების გაერთიანების მიერ მესტიის თამარ მეფის სახელობის აეროპორტის ახალი სამგზავრო ტერმინალის საპროექტო დოკუმენტაციის შესყიდვის მიზნით გამოცხადებულ კონკურსში კომპანია Green Studio-მ გაიმარჯვა.
საქართველოს აეროპორტების გაერთიანების პრესსამსახურის ინფორმაციით, ელექტრონულ კონკურსში 18 კომპანია მონაწილეობდა, რომელთაგან კომისიის წევრებმა არჩევანი Green Studio-ზე შეაჩერა. დაინტერესებულ პირებს კონკურსში მონაწილეობის წინადადების წარმოსადგენად 45 დღიანი ვადა მიეცათ.
,,მოხარულები ვართ, რომ ვიწყებთ კიდევ ერთი ახალი დიდი პროექტის განხორციელებას. მესტიის ახალი ტერმინალის პროექტირების კონკურსში გამარჯვებულმა კომპანიამ თანამედროვე ექსტერიერისა და ინტერიერის მქონე შენობის კონცეპტ დიზაინი წარმოგვიდგინა. რაც მიგვაჩნია, რომ სრულად შეესაბამება ადგილობრივ ლანდშაფტსა და მეტეოროლოგიურ პირობებს. ტერმინალი საათში 100 მგზავრის მომსახურებაზეა გათვლილი. უახლოეს მომავალში Green Studio წარმოგვიდგენს ტერმინალის არქიტექტურულ, კონსტრუქციულ და საინჟინრო დოკუმენტაციას”, – განაცხადა ირაკლი ქარქაშაძემ.
კონცეპტ დიზაინის მიხედვით, ახალი ტერმინალის ჭერში მოეწყობა ე.წ. სქაილაითები, რომელიც დარბაზის ინტერიერის ბუნებრივ განათებას უზრუნველყოფს.
კონკურსის პირობების თანახმად, დაინტერესებულ კონკურსანტებს პროექტირების სფეროში ბოლო 4 წლიანი გამოცდილება უნდა ჰქონოდათ. ამასთანავე, გამოცდილების ნაწილში მთავარი მოთხოვნა იყო პრეტენდენტს მომზადებული ჰქონოდა მრავალფუნქციური საზოგადოებრივი შენობის მინიმუმ ერთი არქიტექტურული საპროექტო დოკუმენტაცია.
ვენეციის ბიენალეზე საქართველოს პავილიონი გაიხსნა
საქართველოს კულტურისა და სპორტის სამინისტროს მხარდაჭერით 19 აპრილს თანამედროვე ხელოვნების ვენეციის მე-60 საერთაშორისო გამოფენაზე – ვენეციის ბიენალეზე, საქართველოს ეროვნული პავილიონი გაიხსნა პროექტით – „დანახვის ხელოვნება – ასტრონომიის მდგომარეობები“.
საქართველოს ეროვნული პავილიონი ევროპელი სპეციალისტების შეფასებით შვიდ აუცილებლად სანახავ საუკეთესო პავილიონს შორისაა. ამგვარი მაღალი შეფასება პირველია საქართველოს ვენეციის ბიენალეში მონაწილეობის 20-წლიან ისტორიაში. პროექტის წარმდგენია თანამედროვე ხელოვნების ცენტრი „არტვილა გარიყულა“, ხოლო საქართველოს წარმომადგენელი ვენეციის ბიენალეზე – ხელოვნებათმცოდნე მაგდა გურული.
გამოფენის კონცეფცია 2024 წლის ვენეციის ბიენალეს – „გლობალურ მოდერნიზმს“ ეხმიანება, რომელიც გლობალური სამხრეთიდან დაძრულ მოდერნისტულ ტალღას ასახავს. პროექტის კონცეფცია ქართველი ხელოვანის, პოეტისა და მწერლის, ილია ზდანევიჩის (1894-1975) მემკვიდრეობას უკავშირდება და მისი საარქივო მასალის ახალ გარემოში წარდგენას ისახავს მიზნად.
პროექტით ილია ზდანევიჩის არქივიდან შეირჩა კონკრეტული ნამუშევარი – „მაქსიმილიანა“, რომელიც გერმანელ ხელოვანთან, მაქს ერნსტთან (1891-1976), მრავალწლიანი მეგობრობისა და თანამშრომლობის შედეგად შექმნილი არტისტული წიგნია. „მაქსიმილიანა“ 1964 წელს ილია ზდანევიჩის რედაქტორობით გამოიცა და ეძღვნება გერმანელი ასტრონომის, ვილჰელმ ტემპელის (1821-1889), კვლევასა და ცხოვრებას, რომელიც ლითოგრაფიის ხელოვნებითა და ასტრონომიით იყო გატაცებული.
ასევე საგულისხმოა, რომ უკვე მესამე წელია, კულტურის სამინისტროს ხელშეწყობით საქართველოს ეროვნულ პავილიონში ეწყობა ხელოვნების რეზიდენცია ახალგაზრდა პროფესიონალებისათვის.
წელს 14 ახალგაზრდა თანამშრომელი საქართველოს ეროვნული მუზეუმიდან შვიდი თვის განმავლობაში იმუშავებს საქართველოს ეროვნულ პავილიონში და მნიშვნელოვან გამოცდილებას მიიღებს.
კულტურის სამინისტრო პროექტის მთავარი მხარდამჭერია. პროექტის მხარდამჭერები არიან ასევე თბილისის მერია, რუსთავის მერია, კომპანია „მაგთი“, „სილკ როუდ ჯგუფი“ და ევროპელი სპონსორები.
გამოფენის ნახვა 2024 წლის 24 ნოემბრამდე იქნება შესაძლებელი.
22 აპრილს „დედამიწის დღე“ აღინიშნება! გარემოზე ზრუნვა ყველას პასუხისმგებლობაა!
22 აპრილს „დედამიწის დღე“ აღინიშნება!
ყოველწლიურად 22 აპრილს, დედამიწის დღე აღინიშნება!
პირველად დედამიწის დღე 1970 წელს აღინიშნა, მას შემდეგ ყოველწლიურად მსოფლიოს 192 ქვეყანაში ჩვენი პლანეტის უკეთესი მომავლისთვის აღინიშნება.
2024 წლისთვის დედამიწის დღის თემა პლასტმასით დაბინძურების წინააღმდეგაა მიმართული და 2040 წლისთვის პლასტმასის წარმოების 60%-ით შემცირებას ითხოვს.
2021 წელს, თემით – „აღვადგინოთ ჩვენი დედამიწა“ – ეს დღე ყურადღებას ამახვილებს ბუნებრივ პროცესებზე, მწვანე ტექნოლოგიების დანერგვასა და ინოვაციურ მიდგომებზე, რომელთაც შეუძლიათ მსოფლიოს ეკოსისტემების აღდგენა.
გარემოს დაცვის და სოფლის მეურნეობის სამინისტროს შემუშავებული პოლიტიკის შესაბამისად დაცული ტერიტორიების სააგენტო უნიკალური ბიომრავალფეროვნების აღდგენის მიმართულებით არაერთ მნიშვნელოვან პროექტს ახორციელებს, რომელთა შორის არის ქურციკების პოპულაციის აღდგენის პროექტი ვაშლოვანის დაცულ ტერიტორიებზე.
თითოეული ჩვენგანის მოქმედებაზეა დამოკიდებული დედამიწისა და ჩვენი მომავალი. ყველას გვჭირდება ჯანმრთელი დედამიწა, რომელიც ჩვენი, ჩვენი შვილების კეთილდღეობის საფუძველია.
ერთად ვიზრუნოთ დედამიწის უკეთეს მომავალზე!
გარემოზე ზრუნვა ყველას პასუხისმგებლობაა!
კრაკოვის ეროვნულ მუზეუმში გაიხსნა ქართული კულტურისა და ისტორიისადმი მიძღვნილი მასშტაბური გამოფენა
საქართველოს კულტურისა და სპორტის სამინისტროს მხარდაჭერითა და პოლონეთის კულტურის მინისტრის პატრონაჟით კრაკოვის ეროვნულ მუზეუმში გაიხსნა ქართული კულტურისა და ისტორიისადმი მიძღვნილი მასშტაბური გამოფენა – „ოქროს საწმისი – საქართველოს ხელოვნება“.
ამის შესახებ ინფორმაციას კულტურისა და სპორტის სამინისტრო ავრცელებს.
მათივე ინფორმაციით, გამოფენის გახსნას საქართველოს კულტურისა და სპორტის მინისტრი თეა წულუკიანი, აჭარის ავტონომიური რესპუბლიკის განათლების, კულტურისა და სპორტის მინისტრი მაია ხაჯიშვილი, საქართველოს საგანგებო და სრულუფლებიანი ელჩი პოლონეთის რესპუბლიკაში დიანა ჟღენტი, ხელოვნების სახელმწიფო მუზეუმის დირექტორი ნიკა ახალბედაშვილი, საქართველოს ხელოვნების სასახლე-კულტურის ისტორიის მუზეუმის დირექტორი და გამოფენის კურატორი გიორგი კალანდია, გიორგი ჩიტაიას სახელობის ეთნოგრაფიული მუზეუმის დირექტორი ნინო ჭიპაშვილი, თბილისისა და სხვადასხვა რეგიონის მუზეუმების თანამშრომლები ესწრებოდნენ.
გამოფენას, ასევე, ესწრებოდნენ პოლონეთის პრეზიდენტის წარმომადგენელი პიოტრ ჩვიკი, პოლონეთის კულტურისა და ეროვნული მემკვიდრეობის სამინისტროს სახელმწიფო მდივნის მოადგილე მარტა ციენკოვსკი, კრაკოვის ეროვნული მუზეუმის დირექტორი ანდჟეი შჩერსკი, გდანსკის უნივერსიტეტის პროფესორი და გამოფენის კურატორი მიროსლავ პიოტრ კრუკი, კრაკოვის მუზეუმის თანამშრომლები და სხვა მიწვეული სტუმრები.
გამოფენის გახსნის ღონისძიებაზე საქართველოს კულტურისა და სპორტის მინისტრმა თეა წულუკიანმა დამსწრე საზოგადოებას მიმართა და აღნიშნა, რომ ამ გამოფენით ქართულ-პოლონურ ურთიერთობებში ახალი ფურცელი გადაიშალა; ასეთი მასშტაბური ღონისძიება ხელს შეუწყობს ორი ერის კულტურის დაახლოებას და ევროპულ ღირებულებებზე დაფუძნებული თანამშრომლობის გაგრძელებას.
აღსანიშნავია, რომ დამოუკიდებლობის აღდგენის შემდეგ ეს არის საქართველოს შესახებ უცხოეთში გამართული უპრეცედენტო გამოფენა. ევროპელი დამთვალიერებელი გაეცნობა საქართველოს მდიდარ კულტურას, ქართული ხელოვნების შედევრებს, ყოფის ამსახველ და საბრძოლო ხელოვნების გამორჩეულ ნიმუშებს. იხილავენ ქართული მოდერნიზმის საუკეთესო წარმომადგენელთა შემოქმედებასაც. ამ ექსპოზიციაზე პირველად გამოიფინა პოლონეთის სხვადასხვა მუზეუმში დაცული არაერთი ქართული არტეფაქტი.
გამოფენაში მონაწილეობს 14 ქართული მუზეუმი როგორც დედაქალაქიდან, ასევე, რეგიონებიდან, კერძოდ: შალვა ამირანაშვილის სახელობის ხელოვნების სახელმწიფო მუზეუმი, სიმონ ჯანაშიას სახელობის სახელმწიფო მუზეუმი, საქართველოს ხელოვნების სასახლე-კულტურის ისტორიის მუზეუმი, თბილისის ისტორიის მუზეუმი „ქარვასლა“, იოსებ გრიშაშვილის სახელობის თბილისის ისტორიის მუზეუმი, ზუგდიდის დადიანების სასახლეთა ისტორიულ-არქიტექტურული მუზეუმი, ელენე ახვლედიანის სახლ-მუზეუმი, კორნელი კეკელიძის სახელობის საქართველოს ხელნაწერთა ეროვნული ცენტრი, ხარიტონ ახვლედიანის სახელობის აჭარის სახელმწიფო მუზეუმი, დავით კაკაბაძის სახელობის ქუთაისის სახვითი ხელოვნების გალერეა, ნიკო ფიროსმანაშვილის სახელმწიფო მუზეუმი, ვანის არქეოლოგიური მუზეუმი, ნიკო ბერძენიშვილის სახელობის ქუთაისის სახელმწიფო მუზეუმი, ბათუმის არქეოლოგიური მუზეუმი; წარმოდგენილია არჩილ გელოვანის პირადი კოლექცია.
გამოფენაში ასევე მონაწილეობს მსოფლიო დონის არაერთი მუზეუმი: ლუვრი, ბრიტანეთის ეროვნული მუზეუმი, ბერლინის სახელმწიფო მუზეუმი, კრაკოვის სახელმწიფო მუზეუმი, იერუსალიმის მუზეუმი, ვაველის სამეფო სასახლე და ვარშავის ეროვნული მუზეუმი.
გამოფენაზე წარადგინეს ორენოვანი – ინგლისურ-პოლონური კატალოგი, რომელიც მკითხველს ქართული კულტურის განვითარების სხვადასხვა ეტაპს აცნობს. კატალოგის ინგლისურენოვანი ვერსია საქართველოს კულტურის სამინისტროს მხარდაჭერით გამოიცა.
საქართველოში გამოფენის მომზადებას ხელმძღვანელობდნენ საქართველოს ეროვნული მუზეუმის გენერალური დირექტორის პირველი მოადგილე, შალვა ამირანაშვილის სახელობის ხელოვნების სახელმწიფო მუზეუმის დირექტორი ნიკა ახალბედაშვილი და ხელოვნების სასახლე-კულტურის ისტორიის მუზეუმის დირექტორი გიორგი კალანდია, რომელიც არის გამოფენის კურატორი. გამოფენას ჰყავს პოლონელი კურატორიც – ცნობილი ბიზანტიოლოგი, პროფესორი მიროსლავ კრუკი.
გამოფენის გახსნისადმი მიძღვნილ ღონისძიებაზე სტუმრებს საშუალება ჰქონდათ მოესმინათ ქართული ხალხური სიმღერები და ენახათ ტრადიციული ცეკვები. ცერემონიაში მონაწილეობდნენ: ფოლკლორული ანსამბლი „შილდა“, ფოლკლორულ-ეთნოგრაფიული ჯგუფი „ძირიანი“ და მომღერალი ნინო ნაყეური.
გამოფენა 2024 წლის 15 სექტემბრამდე გაგრძელდება.
კრაკოვის ეროვნული მუზეუმი საქართველოსადმი მიძღვნილ მასშტაბურ გამოფენას უმასპინძლებს
საქართველოს კულტურისა და სპორტის სამინისტროს მხარდაჭერით ქართული კულტურისა და ისტორიისადმი მიძღვნილი მასშტაბური გამოფენა – „ოქროს საწმისი – საქართველოს ხელოვნება“ – 18 აპრილს პოლონეთში, კრაკოვის ეროვნულ მუზეუმში, გაიხსნება. გამოფენის გახსნას საქართველოს კულტურისა და სპორტის მინისტრი თეა წულუკიანი დაესწრება.
აღსანიშნავია, რომ დამოუკიდებლობის აღდგენის შემდეგ ეს არის უპრეცედენტო მნიშვნელობის გამოფენა უცხოეთში საქართველოს შესახებ და ის პოლონეთის კულტურის მინისტრის პატრონაჟით ტარდება.
მასშტაბური ექსპოზიცია ევროპელ დამთვალიერებელს საქართველოს მდიდარ კულტურას, ქართული ხელოვნების შედევრებს, ყოფის ამსახველ და საბრძოლო ხელოვნების გამორჩეულ ნიმუშებს გააცნობს. დაგეგმილია ქართული მოდერნიზმის საუკეთესო წარმომადგენელთა შემოქმედების წარმოჩენაც. პირველად გამოიფინება პოლონეთის სხვადასხვა მუზეუმში დაცული არაერთი ქართული არტეფაქტი თუ ხელნაწერი.
გამოფენაში მონაწილეობს 14 ქართული მუზეუმი: შალვა ამირანაშვილის სახელობის ხელოვნების სახელმწიფო მუზეუმი, სიმონ ჯანაშიას სახელობის სახელმწიფო მუზეუმი, საქართველოს ხელოვნების სასახლე-კულტურის ისტორიის მუზეუმი, თბილისის ისტორიის მუზეუმი „ქარვასლა“, იოსებ გრიშაშვილის სახელობის თბილისის ისტორიის მუზეუმი, ზუგდიდის დადიანების სასახლეთა ისტორიულ-არქიტექტურული მუზეუმი, ელენე ახვლედიანის სახლ-მუზეუმი, კორნელი კეკელიძის სახელობის საქართველოს ხელნაწერთა ეროვნული ცენტრი, ხარიტონ ახვლედიანის სახელობის აჭარის სახელმწიფო მუზეუმი, დავით კაკაბაძის სახელობის ქუთაისის სახვითი ხელოვნების გალერეა, ნიკო ფიროსმანაშვილის სახელმწიფო მუზეუმი, ვანის არქეოლოგიური მუზეუმი, ნიკო ბერძენიშვილის სახელობის ქუთაისის სახელმწიფო მუზეუმი, ბათუმის არქეოლოგიური მუზეუმი; წარმოდგენილი იქნება არჩილ გელოვანის პირადი კოლექცია.
გამოფენაში მონაწილეობს ისეთი დიდი კულტურული ინსტიტუციები, როგორიცაა: ლუვრი, ბრიტანეთის ეროვნული მუზეუმი, ბერლინის სახელმწიფო მუზეუმი, კრაკოვის სახელმწიფო მუზეუმი, იერუსალიმის მუზეუმი, ვაველის სამეფო სასახლე და ვარშავის ეროვნული მუზეუმი.
გამოფენისთვის მომზადდა ორენოვანი – ინგლისურ-პოლონური კატალოგი.
საქართველოში ექსპოზიციის მომზადებას ხელმძღვანელობდნენ საქართველოს ეროვნული მუზეუმის
გენერალური დირექტორის პირველი მოადგილე, შალვა ამირანაშვილის სახელობის ხელოვნების სახელმწიფო მუზეუმის დირექტორი ნიკა ახალბედაშვილი და ხელოვნების სასახლე-კულტურის ისტორიის მუზეუმის დირექტორი გიორგი კალანდია, რომელიც არის გამოფენის კურატორი. გამოფენას ჰყავს პოლონელი კურატორიც – ცნობილი ბიზანტინოლოგი, პროფესორი მიროს ლავკრუკი.
გამოფენის გახსნისადმი მიძღვნილ ღონისძიებაში მონაწილეობას მიიღებენ ფოლკლორული ანსამბლი „შილდა“, ფოლკლორულ-ეთნოგრაფიული ჯგუფი „ძირიანი“ და ნინო ნაყეური.
გამოფენა 2024 წლის 15 სექტემბრამდე გაგრძელდება.
ინფორმაციას კულტურის სამინისტრო ავრცელებს.
#datashvil #drpkhakadze #sheniambebi #shenidasveneba
ალგეთის ეროვნული პარკი საუკეთესო ტერიტორიაა მეგობრებთან ერთად დროის გასატარებლად
თბილისიდან 70 კმ-ში, 1 საათის დაშორებით მდებარე ალგეთის ეროვნული პარკი საუკეთესო ტერიტორიაა მეგობრებთან ერთად დროის გასატარებლად.
მდინარე ალგეთის ხეობისა და შერეული ტყით დაფარული მთების ხედების ნახვასთან ერთად მოინახულებთ დაშბაშის, ბირთვისისა და სამშვილდის კანიონების ბუნების ძეგლებს, ესტუმრებით კლდეკარის ციხე-სიმაგრეს.
ალგეთის ეროვნული პარკის ტერიტორიაზე ამჟამად ხუთი ეკო-ტურისტული მარშრუტია. საცხენოსნო და საფეხმავლო. მათგან მხოლოდ ერთი ტურისტული ბილიკია მარკირებული – „სამეფო ქედი”. – 16 კმ-იანი წრიული მარშრუტი.
ალგეთის ეროვნულ პარკში მოგზაურობა ვიზიტორთა ცენტრიდან უნდა დაიწყოთ, რომელიც დაბა მანგლისში მდებარეობს. ვიზიტორთა ცენტრში ამომწურავ ინფორმაციას და რჩევებს მიიღებთ დაცული ტერიტორიების შესახებ. გარდა ამისა, ეზოში მოწყობილია ეკოტურისტული ატრაქცია „თოკების პარკი“, რომელიც ბუნებაში არსებული შემეცნებით-გასართობი ადგილია. მოწყობილია 2 ზონა – საოჯახო და მოზარდთათვის, რომლებიც შესაბამისად 10 და 14 სხვადასხვა დაბრკოლებას მოიცავს. შესაბამისად, ვიზიტორთა ცენტრიდან გაუსვლელადაც კი შეგიძლიათ, დროის ბუნებაში სასიამოვნოდ და საინტერესოდ გატარება.