რაჭა საქართველოს გამორჩეული კუთხეა. იგი მდიდარია კულტურის ძეგლებითა და მრავალფეროვანი ბუნებით.
რაჭა ასოცირდება გასაოცარ ბუნებასთან, უნიკალურ კულტურასთან და კიდევ უფრო შთამბეჭდავ სტუმართმოყვარეობასთან. ერთ-ერთი ყველაზე მრავალფეროვანი და ფერადია. სწორედ რაჭის სილამაზე და ორიგინალურობა იზიდავს ყოველწლიურად სულ უფრო და უფრო მეტ მოგზაურს, როგორც საქართველოდან ასევე უცხოეთიდან.
რაჭა მდებარეობს დასავლეთ საქართველოს ჩრდილო-აღმოსავლეთ ნაწილში, მდინარე რიონისა და მისი შენაკადების ხეობაში. ჩრდილოეთით მას ესაზღვრება კავკასიონის ქედი რიონისა და ჭანჭახის სთავეებთან, ჩრდილო-დასავლეთიდან ქვემო სვანეთისგან გამოყოფს მდინარე ასკისწყალი და თავშავის ქედი, სამხრეთით – იმერეთი, აღმოსავლეთით შიდა ქართლისგან გამოყოფილია ჯეჯორის ხეობით უღვირის ქედამდე, დასავლეთით – ლეჩხუმი.
ისტორიულ-გეოგრაფიულად რაჭა სამ კუთხედ იყოფოდა: მთის რაჭა, ზემო რაჭა და ქვემო რაჭა. ზემო და ქვემო რაჭას შორის საზღვარი გადის მდინარე რიონზე ხიდისკარის ვიწროებში სოფელ წესის მახლობლად. ამჟამად რაჭის ტერიტორია შედის ონისა და ამბროლაურის მუნიციპალიტეტებში.
მასალის გამოყენების პირობები
