„თბილისის მუზეუმების გაერთიანება“ პირველია საქართველოში, რომელმაც სამუზეუმო აპლიკაცია დანერგა.
ეს არის ქართული სამუზეუმო სივრცის პირველი ორენოვანი მობილური აპლიკაცია, რომელიც ამავდროულად, გვთავაზობს დღის შთამაგონებელ ფრაზებს, მუზეუმების ისტორიებს, თამაშებსა და კალენდარული თარიღის მიხედვით გვახსენებს ღია კარის დღეების შესახებ.
„თბილისის მუზეუმების გაერთიანება მაქსიმალურად ცდილობს მოერგოს 21-ე საუკუნის სწრაფ ტემპს და ციფრულ სივრცეში შეძლოს სამუზეუმო კულტურის აქსელერაცია.
თბილისის მუზეუმების გაერთიანება გახლავთ პირველი საქართველოში, რომელმაც დანერგა სამუზეუმო აპლიკაცია, რომელიც თავის მხრივ აერთიანებს ცხრა მუზეუმს, სადაც დამთვალიერებლებს შესაძლებლობა ექნებათ გაეცნონ მუზეუმებში მიმდინარე სიახლეებსა და ინფორმაციას იმ შემეცნებითი ღონისძიებების და პროგრამების შესახებ, რაც ამ მუზეუმებში ხორციელდება. დღესდღეობით თბილისის მუზეუმების გაერთიანება 28 სხვადასხვა შინაარსის საგანმანათლებლო პროგრამას ახორციელებს სკოლის მოსწავლეებისა და ნებისმიერ დაინტერესებულ პირთათვის, “ – განაცხადა “ქალების ნარატივში” „თბილისის მუზეუმების გაერთიანების“ გენერალურმა დირექტორმა, ნინი სანადირაძემ.
მისი თქმით, ერთ-ერთი მთავარი ამოცანაა, მუზეუმი იყოს კიდევ ერთი პასუხისმგებელი მოთამაშე თანამედროვე საზოგადოებაში არსებული პრობლემებისა.
„ჩვენი ერთ-ერთი მთავარი ამოცანაა, მუზეუმი იყოს კიდევ ერთი პასუხისმგებელი მოთამაშე თანამედროვე საზოგადოებაში არსებული პრობლემებისა. 8 საგანმანათლებლო პროგრამა სწორედ ეკოლოგიასა და კლიმატის ცვლილებებს ეყრდნობა; გვაქვს მნიშვნელოვანი ამბავი, როგორიცაა მზის ენერგია და ბუნებრივი ენერგიების დანერგვა მუზეუმებში და ბიომდგრადი საღებავების გამოყენების გამოცდილება,“- აღნიშნა ნინი სანადირაძემ.
„თბილისის მუზეუმების გაერთიანების მობილური აპლიკაცია ქართული სამუზეუმო სივრცის პირველი მობილური აპლიკაციაა, რომელიც გარდა თბილისის მუზეუმების გაერთიანების მუზეუმების ისტორიებისა და საგანმანათლებლო პროგრამებისა, შემეცნებით კომპონენტსაც აერთიანებს და ახალ სამუზეუმო თამაშს სთავაზობს დაინტერესებულ აუდიტორიას.
თბილისის მუზეუმების გაერთიანების ორენოვანი მობილური აპლიკაცია ასევე დაინტერესებულ აუდიტორიას მიაწვდის ინფორმაციას საგანმანათლებელო პროგრამების თანმიმდევრობასა და მიმდინარე თუ დაგეგმილი ღონისძიების შესახებ.
თბილისის მუზეუმების გაერთიანება გარდა კულტურული მემკვიდრეობის დაცვისა და სამუზეუმო ფონდების საგანმანათლებლო რესურსებად ტრანსფორმაციისა მიყვება გაერთიანებული ერების მდგრადი განვითარების მიზნებს და ამოცანებს და 2023 წლიდან ცდილობს სამუზეუმო სივრცეში თანამედროვე ტექნოლოგიების დანერგვას, რისთვისაც არაერთი პროექტი განახორციელა პროგრამით „Museums in the Digital Age“, 2023 წლის ბოლოდან bp-ის მიერ დაფინანსებული პროექტის „მეტი ინოვაცია და საზოგადოებრივი ჩართულობა თბილისის მუზეუმების გაერთიანებაში“ – ილია ჭავჭავაძის ლიტერატურულ – მემორიალურ მუზეუმში მზის პანელების სისტემა მოეწყო. ეს არის პირველი შემთხვევა ამიერკავკასიაში, როცა მუზეუმი ბუნებრივი ენერგიის წყაროზე გადავიდა, შეამცირა გარემოზე ნეგატიური ზეგავლენა და მზის ენერგიას მოიხმარს.
სიახლე დაზოგავს მინიმუმ 30 000 კილოვატ ტრადიციულ ელექტროენერგიას, რაც საშუალებას მისცემს მუზეუმს დაზოგოს ელექტროენერგიის გადასახადი და 20 წლის განმავლობაში ხელს შეუწყობს დაახლოებით 150 ტონა CO2 ემისიის დაკავებას და გადაარჩენს 8000-მდე ხეს.
თბილისის მუზეუმების გაერთიანების მობილური აპლიკაციის პრეზენტაციაზე ასევე წარდგენილი იქნება თბილისის მუზეუმების გაერთიანების 2024 წლის გეგმები და პროგრამის „Museums in the Digital Age“ სამომავლო აქტივობები“, – აღნიშნულია ინფორმაციაში.
