ძამის ხეობა შესანიშნავი ადგილია როგორც ლაშქრობისა და ბუნებაში განტვირთვის მოყვარულთათვის, ასევე ქართული კულტურით დაინტერესებულთათვის
ძამის ხეობა შიდა ქართლის მხარეში, ქარელის მუნიციპალიტეტში მდებარეობს. მდინარე ძამა თრიალეთის ქედის ჩრდილოეთ კალთაზე, ზღვის დონიდან 2140 მეტრზე იღებს სათავეს და დაბა აგარაში მტკვარს უერთდება. მდინარის სიგრძე 42 კმ-ა. იგი შესანიშნავი ადგილია როგორც ლაშქრობისა და ბუნებაში განტვირთვის მოყვარულთათვის, ასევე ქართული კულტურით დაინტერესებულთათვის.
კულტურული მემკვიდრეობის ძეგლები, ძველი და ახალი ეკლესია–მონასტრები, ციხე–სიმაგრეები, კოშკები, გამორჩეული ისტორიული და ბუნების ძეგლები – საქართველოს ეს სიმდიდრე ძამას ხეობაში მდებარეობს.
ბუნებითა და კულტურული მემკვიდრეობით დაინტერესებულ მოგზაურებს აქ 60-ამდე ისტორიული ძეგლი, ძველი და ახალი ეკლესია-მონასტრები, ციხესიმაგრეები, კოშკები და ბუნებრივი ძეგლები ელოდებათ.
აქ მდებარე კულტურის ძეგლებს შორისაა XII-XIII საუკუნეების მიჯნაზე დაარსებული ყინწვისის სამონასტრო კომპლექსი დიდებული ფრესკებით, XVII საუკუნის მძოვრეთის ციხე-დარბაზი, 5 ეკლესიისგან შემდგარი ქოზიფას მამათა მონასტერი, იგივე გუგომის ხუროთმოძღვრული კომპლექსი, და ძამის ციხე.
რაც შეეხება ბუნების ძეგლებს, ძამის ხეობაში ნახავთ ტყეში ჩაფლულ ბატეთის ტბას, რომელიც ზღვის დონიდან 1313 მეტრ სიმაღლეზე მდებარეობს, ასევე, მოგზაურთათვის კიდევ ერთი მიმზიდველი ადგილია ძამის ხეობის მარგალიტი, აბუხალოს ჩანჩქერი, რომელიც გაზაფხულზე და ზაფხულში მწვანეშია ჩაფლული და ულამაზეს სანახაობას ქმნის. აბუხალოს ჩანჩქერთან ახლოს აბუხალოს კლდეში ნაკვეთი კომპლექსის მონახულებაც შეგიძლიათ.
