ქობულეთის მუნიციპალიტეტში პიროტექნიკის აფეთქების შედეგად დაშავებული მოზარდი დამწვრობის ცენტრის რეანიმაციულ განყოფილებაშია მოთავსებული და ამ ეტაპზე მდგომარეობა სტაბილურია. ამის შესახებ დამწვრობის ცენტრის ხელმძღვანელმა, გუგა ქაშიბაძემ განაცხადა.
მისი თქმით, ბავშვის მდგომარეობა სტაბილურია, თუმცა დიაგნოზი ძალიან საყურადღებოა.
ქობულეთის მუნიციპალიტეტში პიროტექნიკის აფეთქების შედეგად მოზარდი დაშავდა.
არსებული ინფორმაციით, მოზარდის ნასროლი პიროტექნიკა საწვავის ავზში ჩავარდა და აფეთქდა, რამაც აფეთქება გამოიწვია. მომხდარ ფაქტს ადასტურებენ შინაგან საქმეთა სამინისტროში. 10 წლის ბიჭს მეორე-მესამე ხარისხის მრავლობითი დამწვრობა აღენიშნებოდა.
დაშავებული თავდაპირველად ქობულეთის კლინიკაში მოათავსეს, მოგვიანებით მისი თბილისში გადაყვანა გადაწყდა.
„პაციენტი შემოყვანილია თვითდინებით, ახლობლების მიერ დამწვრობით, განპირობებული პიროტექნიკით. დამწვრობა განისაზღვრება მეორე-მესამე ხარისხით. არის გულმკერდის, ყელის მიდამოებში. კატასტროფის ბრიგადით გადაყვანილია თბილისში, დამწვრობის ცენტრში სტაბილურ მდგომარეობაში. დამწვრობის ცენტრში გადაყვანა გახდა საჭირო, რადგან მრავლობითი დამწვრობა აქვს გულის, ყელის მიდამოში, ზემო სასუნთქი გზების დაზიანებით და საჭიროებს შესაბამის მკურნალობას დამწვრობის ცენტრში, ამიტომ გადაყვანილია კატასტროფის ბრიგადის მიერ თბილისში. პაციენტი იყო კონტაქტური, 10 წლის ბიჭი“, – განაცხადა ქობულეთის „ევექსის“ ჰოსპიტალის ემერჯენსის მიმღებმა ექიმმა, ფატიმა ბეჟანიძემ.
#datashvil #drpkhakadze #sheniganatleba
