საქართველოს ეროვნული მუზეუმი 2004 წელს დაარსდა და ის დღეს ყველაზე დიდი სამუზეუმო გაერთიანებაა საქართველოში. მის შემადგენლობაშია: 10 მუზეუმი, ეროვნული გალერეა, 4 სახლ-მუზეუმი და 2 სამეცნიერო კვლევითი ცენტრი.
ეროვნულ მუზეუმში თავმოყრილია მრავალი კოლექცია: ევრაზიაში აღმოჩენილი უძველესი ადამიანის ნაშთები, უნიკალური არქეოლოგიური და ეთნოგრაფიული ნივთები, ბუნების ისტორიის ამსახველი მასალა, ქრისტიანული კულტურის მდიდარი მემკვიდრეობა – ჭედური და ფერწერული ხატები, ჯვრები, ნაქარგობა, ტიხრული მინანქარი; პირველხარისხოვანი აღმოსავლური ძეგლები, ნუმიზმატიკის მდიდარი კოლექცია, ოქროსა და ვერცხლის ნატიფი სამკაულები ანტიკური კოლხეთიდან, სხვადასხვა დროის ქართველი და ევროპელი მხატვრების შესანიშნავი ნამუშევრები.
საქართველოს ეროვნული მუზეუმი ქვეყნის 16 მუზეუმს აერთიანებს, მისი კოლექციებიც მრავალფეროვანია. საქართველოს ეროვნული მუზეუმის ფონდებში დაცულია მდიდარი არქეოლოგიური და ეთნოგრაფიული მასალა, ქართული ოქრომჭედლობის, ხატწერის ნიმუშები და სხვა.
აქ ნახავ ყურძნის მტევნების გამოსახულებებით შემკულ უძველეს ღვინის ჭურჭელს, ქვევრს, რომელიც ძვ.წ. VI ათასწლეულით თარიღდება. აქაა 1937 წელს თრიალეთის ყორღნებში აღმოჩენილი ვერცხლის თასი, რომელიც ძვ.წ. II ათასწლეულის პირველ ნახევარს მიეკუთვნება.
მუზეუმში დაცული ძვ.წ. VI-V საუკუნეების ვერცხლის ტეტრადრაქმა, „კოლხური თეთრი“ ადასტურებს, რომ საქართველოში ფულის მოჭრის ისტორია ოცდაშვიდ საუკუნეს ითვლის და კოლხეთი სამონეტო ცივილიზაციის ერთ-ერთი უძველესი კერა იყო მსოფლიოში.
