მაქმანებიანი სახლი გუდიაშვილის მოედანზე.
ეს ულამაზესი სახლი აღა-მაჰმად- ხანის მიერ დანგრეული და შემდგომ აღდგენილი თბილისის ერთ-ერთი ყველაზე ძველი საერო ნაგებობაა. მას აქვს კამაროვანი სარდაფი ,რომელიც სახლზე ბევრად ძველია.
მე -19 საუკუნეში შენობა იყო რუსეთის იმპერიის სამხედრო მოსამსახურეების შტაბი. სარდაფში იყო ჰაუპტვახტი. 1838 წელს ამ შენობაში ან ცხოვრობდა ან ,ზოგი ვერსიით , ჰაუპტვახტში იჯდა მიხეილ ლერმონტოვი. სწორედ ამ ფაქტის გამო იმ ქუჩას, სადაც ახლა ეს სახლი დგას 1900 წელს დაერქვა ლერმონტოვის ქუჩა ( ადრე მთის ქუჩა ერქვა) .
შენობის მარჯვენა ვიტრაჟებიანი ნაწილი 1830 წელს აშენდა, ხოლო მარცხენა – 1850 წელს. სახლს ერთ-ერთი ყველაზე ძველი ხის ჭვირული აივანი აქვს, აღმოსავლური ორნამენტებით.იმ პერიოდში სახლი იმპერიალისტურმა მთავრობამ ქართველ ხელოსნებს აღადგენინა.
ამ შენობაში დიდი ხნის განმავლობაში იყო მწერალთა კავშირის გაზეთ “ლიტერატურული საქართველოს” რედაქცია. გაზეთი გამოდის 1931 წლიდან.
